Kontra-BIDA

Kabaliktaran. Kabaliktaran sa ungod nga buhay.

Karuyag ko matawa. Karuyag ko masina. Guintagan kita sin ngaran nga sugad sine pero sa ungod nga buhay dire ngay-an kita sugad. Halimbawa nala an ngaran na ‘Gloria’. Huna naton nga sa iya termino mayda kita ‘glorya’. Wara man ngay-an. Kay siya man la ngan an iya mga urupod an mayda ‘glorya’ sa sulod san siyam ka-tuig nga naguin presidente siya san Pilipinas.

Sa bungto ko sa Lavezares, mayda liwat mga ngaran nga dapat dire mao an iguinpangaran sa ira. Diri ko na sasayoon kon mga sin-o ine sira. Pero mayda nalabaw sa ngatanan. Exemplary kon baga. Diri exemplary sa kaupayan san mga maupay nga binuhatan kundi sa karautan san iya mga binuhat ngan bubuhaton pa. Pag-imod ko wara ine siya respeto para sa iba nga tawo, kaya para sa ako, dire liwat na-angay nga tagan siya sin pagrespeto. Well, bagaw pa ngani, ‘respect is earned’.

Karuyag ko la ipaabot sa iya, nga diri ako nahahadok sa iya. Next year, eleksyon na liwat. Magtitindog ako, magboboses ako diri la para sa akon kaupayan ngan san akon pamilya kon diri para liwat san akon bungto ngan igkasi ko Lavezaresnon. 

Maniniguro ako, mangangampanya ako para sadton mga tawo nga sa pag-imod ko mayda kapas bumolig san mga kablas maski nano nga oras, magserbisyo sin tangkod nga diri uunahon an iya kalugaringon nga interes. Maniniguro ako mangampanya para sadton mayda kahadok sa Ginoo ngan nakilala sa Iya. Maniniguro ako para sadton diri an ngaran kabaliktaran san karuyag sidngon.

Kamusta na ngay-an an iyo kampanya nga pagbabag-o sadto nga naglabay nga eleksyon, hain naman iton yana? Lugod iyo iguinpa-imod nga an iyo mga ugali an angay sin pagbabag-o. Sayo ako san mga saksi san iyo pandaya, san iyo mga limbong sadton Eleksyon 2007.

Klaro kaupay nga dumaog si Tingting Saludaga nga Mayor san bungto, nga mayda lamang sin sobra 700 nga botos tapos hasta pa yana iyo babaliktaron nga siya pa an nandaya sa iyo? Nakain na ba an iyo mga konsensya? Nakain na ba an iyo pamatasan? An Lavezares yana napupuno san mga santo maski diin kamo kumadto pero ambot gud man kon nakokonsyensya kamo san iyo mga binubuhat. An iba naiimod ko pa nga nasimba. Ambot, kasuol pagparaisipon.

Karuyag niyo kawaton an poder kan Mayor Tingting? Nagdaya na ngani kamo kaya ka ngani mayda puwesto yana, iyo na ngani guintamak-tamakan an pagkatawo sini nga akon hinigugma nga mayor, iyo na ngani iguinbalong sa iya an maski nano nga mga isyu maiubos la niyo siya, tapos yana ultimo an pagtuo san mayorya san mga taga-Lavezares, iyo pa kakawaton. Sobra na iton! Gluttony na iton. Kahakugan ba sa poder.

Next year, we will see each other again. Sa kampanya, sa sulod san presinto ngadto sa Municipal Canvassing ngadto sa maimod niyo nga talaga diri kamo an ungod nga bida, ngan dire ikaw an ungod nga bida. Kay sa ungod la, sayo man la an ungod nga bida sa mga kasingkasing san kadam-an sa Lavezares ngan sa akon kasingkasing: Si TINGTING la waray na gud iba. Peksman, mamatay pa ako, aram ko nga sayo la nga Tingting an iyo katapat. #  (Carl Jamie Simple S. Bordeos)